Meer oor die welsynsorganisasie Volkshulp 2000



	Meer oor Volkshulp 2000


		Die Volkshulp 2000 organisasie doen presies dit wat sy naam sê: Dit verleen hulp aan ons volksgenote wat maatskaplike nood ervaar. Volkshulp 2000 is 'n volkseie instelling. Die organisasie is reeds op 21 Julie 1991 gestig, en daar is tans 'n aantal Volkshulpkomitees landswyd. Benewens dit is daar ook talle ander projekte aan die gang. Volkshulp 2000 is soewerein, staan volwaardig op sy eie bene en is van GEEN ander instansie afhanklik nie. Die organisasie behoort aan ons volksgenote wat ons in staat stel om 'n welsynsdiens te kan lewer. GEEN staatsubsidie van ENIGE AARD word ontvang nie, en dus is Volkshulp 2000 van ons volksgenote se welwillende bydraes afhanklik. Volkshulp 2000 is 'n a-partypolitieke instelling, en is ook nie aan 'n spesifieke kerklike denominasie gekoppel nie. As sy vaste grondslag, berus Volkshulp 2000 op Christelik-volkseie beginsels, en handhaaf ons die Christelike Bybelse norme. Ons glo dat God Drie-enig volkome beskik oor die bestaan en lotgevalle van volkere. Daar bestaan by sommiges nog verwarring oor die PLEK van Volkshulp 2000 as volkseie welsynsinstelling, vergeleke met ander organisasies of instellings met amper soortgelyke oogmerke as Volkshulp 2000. Sommige vriende is bv. van mening dat Volkshulp 2000 deel uitmaak van ander volksgerigte organisasies. Dit is nie die geval nie, en was ook nooit die geval nie! Volkshulp 2000 is 'n selfstandige, gevestigde en suksesvolle instelling wat finansieel sowel as organisatories onafhanklik is. Die VOLKSHULP-hand word wel uitgereik na alle volksgerigte organisasies wat op die wyduiteenlopende en omvangryke welsynsveld beweeg, of daarmee te make het. Daar word gevolglik oorkoepelend en koördinerend opgetree, en word hulp sover moontlik verleen--selfs aan diegene wat staatsubsidies ontvang. Laasgenoemde is veral die geval waar volksgenote se nood so groot is, dat die subsidie-inbetaling, sommer ver tekort skiet. Die interessante is dan ook dat sulke instellings inderdaad na Volkshulp 2000 opsien om hulp, en in ander gevalle, selfs verwag dat Volkshulp 2000 hulle moet ondersteun. Hoofbestuurslede van Volkshulp 2000 Raadpleeg asseblief ook Vrae en Antwoorde vir meer spesifieke inligting.